सुबुंथिया आथिखालाव सोलायनायनि मुगायाव दङ जेराव उन्दैसमनि आबुंथिनङैखौ उनथिं गारबोगासिनो दङ आरो आबुंथिनि दरजाखौ सौहैगासिनो दङ। मुलुगनि माखासे बादि, भारतारि समाजखान्थिआ बे समाव गुदु गादा सोलायनायफोरनि गेजेरजों थांगासिनो दङ जेराव फारिनेमफोर, दाथायफोर, आरो सिगां समफोरनि खिन्थिफोरा आथिखाल मुलुगनि बेले बेजे नंगुबैफोरा सिनायथिहोबावनो हानाय नंलिया। बेकटि आरो समाजखान्थिनि थाखोयाव जेरावबो गाबज्रिखावनाया मोनसे आखल आखु सोरजिफिन्नायनि थाखाय सोलायनायनि बे खान्थिफारिखौ दैदेन्नो आरो मिथिहोसिननो।

जारिमिनारियै, सुबुं आखुथायखौ सोदोमस्रिखालामनायाव धोरामा गुदि गोहो जाबादों आरो बेनि बाहानदारिफोरा आखल आखुथि आरो नेमखान्थिआव समाजहाबा दाथायखौ दोनथुमबाय। सोरगोयारिगुण रादाबगिरिफोर जेरै बादि कृष्ण, बुध्द, झरशटर, मसेस, जेशुश कृष्ट आरो राफोदाय मुहाम्मदआ मोनफ्रोम मुगानि गोनां जानायफोरनि थाखाय जीउमारि आरो आखल आखु फोरोंनायफोर गोनांथिखौ जगायनायजों सोदोमस्रि दावगाहोबाय।

बाहाई फोथायनाया सोरगोयारिगुण फोरमायनायनि बे माब्लाबाबो जोबनो रोङै खान्थिफारिआव गोदानथार बाहागो। बाहाउल्लाह, बाहाई फोथायनायनि गाइसनगिरि राफोदाय, फोरमायथिदोंदि सुबुंथिया दानिया बेनि जयै जौगानायाव मोनसे गिदिंनाय बिन्दोआव दङ जेराव बेहा बोलोफोर आरो मावगोहोफोर गोनांजानाया दंजायो सुबुंहारिनि खौसेथिखौ मोनफुंनो। बे खौसेजानाया, जाय फैबाय थानाय मुगानि सुबुंथिनि शाफ बुजानाय (hallmark) जाथारगोन, बेकटि, समाज, आरो समाज खान्थिनि दाथायफोरनि थांना थानाय जीउनि आबुं फिनबिथोनहोनाया नांफागोन।

सोलायनायनि बे मुगायाव बाहाई फोथायनायनि थांखिया दुंखांहोनो, खांबोनो आरो दैदेन्नो बेकिटनि आरो समाजखान्थिनि दाथायफोरनि इसिंयारि थांना थानाय जीउनि जैबिक गुस्लायनायखौ जेरै मानषिहारिनि खौसेथिनि सुफुंथांखि फारसेथिं दावगानाय बादियै।