মীওইবগী চিংলেম্বদা অচেৎপা থাজবা থম্বগা লোয়ননা, বাহা’ইশিংনা থাজৈ মদুদি খুন্নাইবু নুঙাই য়াইফহন্নবা লন্নাই মীওইশিংদা লোত্তুনা য়াওরিবা তৌবা ঙম্বশিং অমসুং মগুনশিংদুবু পরিং পথাপ নাইনা অমসুং তুংকোইনা য়োকখৎপীবা মথৌ তাই। খুন্নাইবু অৱাংবা থাক্তা পুখৎনবগীদমক্তা লন্নাই মীওই খুদিংমক্তা লৈরিবা পাকচাওরবা পাঙ্গল-শক্তিশিং অদুবু শিজিন্নবা য়াহনগদৌরিবসি মহৈ মশিংননি। অচুম্বা ৱাত্ত-পাদবা অদুদা শরুক তম্নবগীদমক্তা, মহৈ মশিংনা মীওই পুন্সি মহিংগী নুংগী অমদি পোৎচাক্কী ওইবা মায়োল অনিমক্তু য়েঙশিনগদবনি।

বাহা’ইশিংনা পায়খৎলিবা খুন্নাই শেমগৎপগী থবক থৌরমশিংগী মায়োলদা লৈরিবসি মীয়ামগী য়াইফনবা পুন্সিচুপ্পা সেবা তৌজনবা লন্নাই মীওইশিংনা নুংগী অমসুং ৱাখল লৌশিংগী তৌবা ঙম্বশিংদুবু শেমগৎনবা পান্দম থম্লিবা মহৈ মশিংগী থৌরমশিংনি।

অঙাংশিং
অঙাংশিংগী নুংগী ওইবা মহৈ মশিংগীদমক্তা লৈরিবা ক্লাসশিংদু মখল মথেল কয়াদা খেন্নবা মফমশিংদা পাঙথোক্লি। মখোয়গী পান্দমদি মীওইবা অমবু নুংগী ওইনা চাওখৎহনগদবা নুংগী ওইবা গুনশিং, থাজবশিং অমসুং লিচৎশিংদুবু চাওখৎহনবনি।

ইনখৎলক্লিবা নহাশিং
লৈবাক শিন্থুংবদা লৈরিবা ইনখৎলক্লিবা নহাশিংনা ৱারেপশিং লৌনবগীদমক্তা নুংগীওইবা মিৎয়েং অমদি লমচৎ শাজৎকী চৎন-কাঙলোন (ফ্রেমৱার্ক) অমা শেমজবদা মখোয়দা মতেং ওইগদবা কাঙলুপশিংদা নহাশিংনা শরুক য়ারি। মখোয়না মখোয়গী ফোংদোকপগী শক্তি অদু চাওখৎহল্লি অমসুং মখোয়গী মরাংকাইরবা পাঙ্গল শক্তিশিংদুবু মখোয়গী খুন্নাইশিংগী সেবা তৌনবা পরিং নাইহনবী।

নহা অমসুং অহলশিং
দিসেন্ত্রেলাইজ ওইবা মহৈ মশিংগী প্রোসেস অমগী মতেংদগী, লৈবাক শিনথুংবদা লৈরিবা খুঙ্গংশিং অমসুং সহরশিংগী নাইবরহুদশিংদা লৈরিবা নহা অমদি অহলশিংনা মখোয়গী খুন্নাইশিংদা সেবা তৌনবগী ৱাখল লৌশিং, লমচৎ শাজৎ, নুংগী ওইবা অমসুং ওইথোকপা য়াবা তৌবা ঙম্বশিং অদু চাওখৎহল্লি।