মহাদেস মচা অমগুম ওইরিবা ইন্দিয়া অসি লাইনিং অসিনা হেক লৈরকখিবা মতমদুদগী হৌনা বাহা’ইগী পুৱারীগা য়াম্না নক্নবা মরি অমা লৈরকখি। শৈদ-ই-হিন্দি অসি মহাদেস অসিদগী বাব (বাহা‘উ’ল্লাহগী লময়ানবা)

বাহা‘উ’ল্লাহগী তম্বীরোলশিংসি ইন্দিয়াদা ইহান হান্না ১৮৭২দা মহাদেস অসিবু ফাওদুনা লাকখিবা পর্সিয়ানগী অঙম অথৌশিং অমা ওইরম্বা, জমাল ইফেন্দীনা পুরকখি। মহাক্না অৱাংলোমদা রামপুর অমসুং লক্ষনৌ চৎখি, নোংপোকলোমগী কলকত্তা অমসুং রেঙ্গুন্দা চৎখি অমসুং নোংচুপ্তা বরোদা অমসুং মুম্বাইদা চৎখি অমসুং মমৈথঙদা খাথঙবদা লৈরিবা চেন্নাই অমসুং কোলোমবোদা চৎখি। মহাক্না বাহা‘উ’ল্লাহগী অপুনবা অমসুং মরুপ মপাং ওইবগী তম্বীরোলশিংবু মহাক্না থেংনবা পূম্নমক্তা, নৱাবশিংদগী হৌদুনা, নিংথৌগী মচাশিং অমসুং লোইলম শাষন তৌরম্লিবা লৈঙাকপশিং অমসুং অচম্বা মীওইশিংদা খঙহনখি। মতমদুগী খুন্নাইদা চৎনরম্লিবা চৎনবীশিংগী ওন্না তৈননা, মহাক্না খুন্নাই খুদিং অমসুং হৌরকফম খুদিংমক থাক খুদিংমক্তগী লাকপা মীওইশিং, জাৎ অমসুং লাইনিংলোন্দা থাজবা মীওই পূম্নমকশিংগা পুনমিন্নখি।

চহি চা অদুনা লোইশিন্দুনা অনৌবা অমা হৌগৎলকপা মতমদুদা, বোম্বে, দেল্লি, পুনে অমসুং হায়দ্রবাদতা অপীকপা বাহা’ই খুন্নাইশিং লৈরকখি। মহাদেস মচা অসিগী বাহা’ইশিংনা মখোয়গী হেনগৎলক্লিবা বাহা’ই খুন্নাইশিংদুগী থবক থৌরমশিংদুবু ঙাকশেন্নবা লৈবাক্কী ওইবা বোদী অদু ইহান হান্না ১৯২৩দা খনখি।

কুনশুবা চহীচাগী হৌগৎলকপা চহিশিংদুদা ইন্দিয়াদা লৈরিবা বাহা’ই খুন্নাই অদুনা পাকচাওবদা অমসুং মপাঙ্গল কনবদা লেপ্তনা হেনগৎলকপগা লোয়ননা, বাহা‘উ’ল্লাহগী তাকপী তম্বীরোলশিং অদু তপ্না তপ্না মতমদুগী শকনাইবা লুচিংবশিং অমসুং ৱাখল্লোইশিং অদুনা খঙলকলম্মী। মহাত্মা গান্ধীনা বাহা’ই কয়াগা তোৎনা তিন্নরুবা মতুংদা অসুম্না হায়বীরম্মী : ‘‘বাহা’ইগী লাইনিং অসি মীওইবা জাতীআ ৱারবা মতমদা লৈতাফমনি।’’ চপ মান্ননা, রবীন্দ্রনাঠ টেগোরনা শক্নাইরবা বাহা’ই কয়া অমা উনরবা মতুংদা বাহা‘উ’ল্লাহবু এসিয়াদগী থোরকপা খ্বাইদগী নৌরিবা লাইপোকনি’’, মদুগী ‘‘পাওজেল অদু সভেত্যনা চাওখৎহন্নবগীদমক্তা য়াম্না চাওনা মরুওই।

১৯৬০ অমদি ৭০গী মতমদুদা, বাহা‘উ’ল্লাহগী পাওজেল অদু ইন্দিয়াগী মীয়ামদা, অখন্ননা খুঙ্গংদা লৈরিবা মীয়ামদা পাওদম্বা হৌরকখি। লাইনিং অসিগী তাকপী তম্বীবশিংগী মগুনবু খঙজরকপসি অয়াম্বা মতমদা মদুবু থেঙনরুবা মীওইশিংদুগী থম্মোয়শিংদুদা মথন্তা ফাওজরকপা ওই, অমসুং ইন্দিয়া মচা লিশিং-চা কয়ানা মালেম অসি ইমুঙ অমত্তনি হায়না য়েলহৌঙৈদগী মখোয়না কুইনা নিংজরকপদু তম্বীরোলশিংদুদা মপুঙফাবা উজৈ। মসিগী ফিদমশিং অসিবু হৌজিক মতমগী খুন্নাই অসিগী দরকারশিংদুগা চুনবা মওংদা পানশিন্নবগী অনৌবা ইথিল অমা মখোয়না ফঙজখি।

মীওই লিশিং লিশিংনা মসিবু মখোয়গী খুন্নাইদা থেঙনরিবা লুনা থোকপা থবকশিংদুদা পানশিন্নবা কন্না হোৎনবা হৌরকখি। ইন্দিয়াগী মফমশিনথুংবদা লৈরিবা খুন্নাইশিংদুনা লোকেলগী ওইবা বাহা’ই লৈঙাক্কী বোদি চাম্মা চাম্মা গনতন্ত্রিক ওইবা মীখল তৌদুনা খল্লম্মী অমসুং মখোয়না মখোয়গী লমদমশিংদুগী দরকারশিংদুবু য়েঙশিনবা হৌরকখি। অঙাংশিংগী লমচৎ শাজৎকী ওইবা মহৈ মশিং অদু নৌহৌনা তৌদবা য়াদ্রবা থবক অমা ওইরকলম্মী অমসুং ইন্দিয়া শিন্থুংবদা লৈরিবা খুঙ্গংশিংদা মহৈ মশিংগী ওইবা হোৎনথোকপশিং উরম্মী। ১৯৮০ অদুৱাইদদি, বাহা’ইগী তম্বীরোলশিংদা য়ুম্ফম ওইবা খুঙ্গংশিংদা টুতোরিএল স্কুলশিং, লোই-লোইননা মশিং য়াম্লবা অচৌবা স্কুলশিংসু লৈবা হৌরকলম্মী, লোই-লোইননা লৌউ-শিংউবগী, ভোকেস্নেল অমসুং ওজা ট্রেনিং তৌনবা, ইবা পাবা তম্নবা, অকোয়বগী মহৌশা প্রকৃতিবু য়েঙশিন্নবগী, নুপীশিংবু পাঙ্গল-শক্তি হাপ্নবগী, অমসুং হকশেলগী, নুপীশিংবু পাঙ্গল-শিক্ত হাপ্নবগী, অমসুং হকশেলগী ওইবা হীরমশিংদা প্রোজেক্ট কয়া অমসু পায়খৎখি।

নিউ দিল্লিদা বাহা’ইগী লাইশঙ শারকপা অদুনা বাহা‘উ’ল্লাহনা মীওইবগী থম্মোয় অমদি খুন্নাইগীদমক্তা য়েঙলমলিবা হোংহনবগী মওং অদুগী খ্বাইদগী খঙনরবা খুদম ওইরকখি। থম্বালগী মতৌগুম্না শেম্লিবা মওং অদুনা খ্বাইদগী ৱারবা ফিভমশিংফাওবদা অনৌবা অমসুং হেন্না ফবা মালেম অমা লৈশাৎ তম্বা ঙমলক্কনি হায়বগী থাজবা অদু উথোকই। মসিনা অপুনবগী খুদম অমসু ওই। ১৯৮৬ তা হাংদোরকখিবা মতমদুদগী হৌনা, নোংমদা লাইনিংলোন, জাৎ-বিজাৎ নত্রগা খেন্ন-খেন্নবা লৈবাক পুম্নমক্তগী লাক্তুনা মীওই লিশিং তরানা অমত্তা ওইবা শেম্বীবা মহাকপু মসিগী লাইশঙ অসিগী মখাদ চিক্না লাই খুরুমজৈ।

ইন্দিয়াদা লৈরিবা বাহা’ই খুন্নাই অসিনা হেন্না পাকথোক চাওথোরকপা অমসুং পাঙ্গল শক্তি হেনগৎলকপগা লোয়ননা, মখোয়না খুন্নাইগী পুন্সিদা হেন্না মশকথোকপা থৌদাং লৌবা হৌরকই। লৈবাক্কী থাক্তা লৈরিবা মীফম অয়াম্বশিংদা, কাঙলুপ মশেলগী চান্না চিন্নবা, নুপী নুপা মান্নবা, মহৈ মশিং, নুপী অমসুং নুপাগী থাক মান্নবা লৈঙাকপা অমসুং চাওখৎপগী মতাংশিংসিগী মরমদা খুমাঙচাওশিনবগী মতাংদা খন্থমিন্নবদা বাহা’ইশিংনা শরুক তম্লিবসি হেন্না মমল য়াম্বা ওইরক্লি।

ঙসিদি, ইন্দিয়াদা লৈরিবা বাহা’ইগী মশিং অসি লাখ কুন হেল্লে। মখোয়না লৈবাক অসিদা লৈরিবা মীয়ামশিংগা লোয়ননা অপুনবা অমসুং অচুম্বা ৱায়েল লৈবা, য়ুম্ফম য়াওদবা লান্না থাজবা পূম্নমক্তগী নিংতমজবা, নুপী অমদি নুপাশিংনা লেং মান্ননা পুন্না সেবা তৌমিন্নবা, অঙাংশিং অমসুং নহাশিংনা নুংগী অমদি বিজ্ঞানীক্কী ওইবা মহৈ মশিং অনীমক ফঙজবা, অমসুং খুন্নাইগী পূন্না লাইখুরুমমিন্নবগী পুন্সি অদুনা শোকহন্নিংঙাই ওইবা খুন্নাইগী শাফুশিংদগী ঙাকশেনবীবা খুন্নাইশিং শেমগত্তুনা মখোয়গী লৈবাকপু সেবা তৌনবা কত্থোকচরি।