“ৱা-তান্নবনা অহেনবা খঙবা উবদু পীনবি অমসুং মোৎশিংবু শোইদ্রে হায়না খঙবদুদা ওন্থোকপী। মসি, মম্লবা মালেম অমা লম্বীদুবু লমজিংলিবা অমদি লমজিং লমতাক পিরিবা, লঙনা ঙাল্লিবা মঙাল অমনি। পোৎ খুদিংমক্কী মপুঙফাবগী অমদি খ্বাইদগী খুমাঙচাওশিন্নবগী ফম্বাল অমা লৈদুনা লাক্লি অমসুং লৈশু লৈখিগনি। ভাব তাবগী খুদোলগী মপুঙফাবা অদু ৱা তান্নবগী মতেংদগী শাফোঙহল্লক্লি।”
— বাহা‘উ’ল্লাহ
বাহা’ইগী লাইনিং অসিদা পুরোহিৎ লৈতে। মখোয়গী থবক থৌরমশিংসি মীখল তৌদুনা অরোনবা বেল্লোটকী মতেংদগী খন্দুনা লৈকাই, রিজনেল, লৈবাক অমসুং মালেমগী থাক্তা লৈবা সঙস্থানশিংগী মতেংদগী ঙাকশেল্লি। মীখলশিং অসি ভোত খোম্বা নত্রগা প্রচার তৌবা য়াওদনা পাঙথোকই। মসিগী সঙস্থানশিংসিদা খল্লক্লবা থাজরোইশিং অসি লন্নাই মীওই ওইনা শক্তি অমত্তা লৈতে, অদুবু মখোয়না মেম্বর ওইরিবা সঙস্থান অদুনা লেজিসলেতিভ, একজিক্যুতিব অমসুং জুদিসিয়েল ওথোরিটি অদু শিজিন্নৈ। সঙস্থানশিং অদু বাহা’ই খুন্নাইগী পুন্সিগী মনুঙগী ওইবা মায়োনশিংদুবু য়েঙশিন্নবগী থৌদাং লৌই, লোইনা লোইননা খুন্নাই অদুদা নুঙগী অমসুং পোৎচাক্কী ওইবা রিসোর্সশিংসু ফঙহল্লি।
বাহা’ইগী লৈঙাক পরীংগী শরুক অমা ওইরিবা, মসিগী সঙস্থানশিং অসি, ৱা-তান্নবগী চৎনপথাপকী মতুং ইন্না মথৌ পাঙথোকই। মসিগী চৎনপথাপ অসিগী মতুং ইন্না, সঙস্থান অমগী মীওইশিংদুনা খন্না নৈনববু হীরম খুদিংমক্কী অচুম্বা থিদোক্নবা পাম্বৈ অমা ওইনা পাঙথোকই। মখোয়না ময়েকশেঙনা মখোয়গী ৱাখল্লোনশিংদু থম্মী অদুবু লন্নাইগী ওইবা মিৎয়েংশিংদুদা নপশিন্দনবা হোৎনৈ, অমসুং তশেং তশেংনা ওইরিবদুগী মতাংদা হেন্না পাকচাওবা মিৎয়েং অমা ফংনবা অতোপ্পশিংগী মিৎয়েংদগীসু তমশিন্নবা হোৎনৈ। ইশাগী খল্লগা নমথাক তৌবা, অমগা অমগা নাকপাক তান্নবা, অমসুং লন্নাইগী ওইবা অপাম্বা নত্রগা খোইদাজবশিংবু নমদুনা তৌহন্নবগী অতোপ্পা মওং কয়া অমা অসুম্না নাথৈরম্মী।
