মতমগী মতুং ইন্না, বাহা‘উ’ল্লাহগী তম্বীরোলশিংদা হেন্না ফবা মালেম অমগী শুহ্মৎনিংঙাই ওইরবা শান্না য়েংবা মিৎয়েং অমা অমসুং মদুবু থবক্তা ওন্থাক্নবগী পান্দমদা চঙশিনবা থবকশিংদুবু লমজিংগদবা চৎন-পথাপশিংদুগী মতাংদা য়াম্না ৱাহন্থোক লৈবা জ্ঞানশিং ফঙজবা মীয়ামগী মশিং হেন্না হেন্না হেনগৎলক্লি। কয়া অমনা মখাতানা বাহা’ইগী লাইনিং অসিবু লাইনিংলোন অমা ওইনা কুপ্না নৈনজৈ। অসুম্না তৌবদা, মীওইবগী মওং মতৌগা মরিলৈনবা হীরমশিংগী মতাংদা শন্দোক্না তাকপীরিবা, তাইবং মপুনা মীওইবা খুন্নাইবু লমজিং লমতাকপীবগী মওংদুগী মরমদা শৈথারিবা, ঙসিগী মালেম অসিদা পুন্সিগী পান্দম অমদি শিরবা মতুংগী পুন্সিগী মওং মতৌদুগী মতাংদা পীরিবা ৱাফমশিং, অমসুং লন্নাই অমদিআ অপুনবগী ওইবা লাইনিংবগী পুন্সিগা মরিলৈনবা নিয়োমশিং মতাংদা মদুনা শন্দোক্না তাকলিবশিংদু মখোয়না কুপ্না থিজিঞ্জৈ। অদুগা শোইদনা মখোয়না মদুগী অশেঙবা অইবশিং অমদি আইনশিং, অমসুং চৎন-পথাপশিং অমসুং মদুগী লৈঙাক শাষনবু ঙাক্লিবা নিয়োমশিংদুসু খঙলকই। হায়রিবশিংসি অমদি মসিগা মান্নবা ময়ামদুবু য়াজবদুনা বাহা‘উ’ল্লাহগী তম্বীরোলশিংবু তশেংবা ওইহন্নবা হোৎনরিবা পাঙ্গল শক্তি লৈবা খুন্নাই অমগী পুন্সিদা শরুক য়ানবগী লম্বেলশিং মখোয়গীদমক্তা হাংদোকপী। বাহা’ইশিংনা মখোয়গী থাজবশিংদু অতোপ্পদা পাওদমনিংবা হায়বসি হৌনশানি, অমসুং কনাগুম্বনা মহাক্কী থম্মোয়দা থাজবগী মৈরিক অমা ফাওজরবদি, নুপা নত্রগা নুপীদুনা বাহা’ই খুন্নাইগী ইচং থৌবা মীওই অমা ওইরক্নবা, অমসুং মদুগী মখাতানা চাওখৎপদা শরুক তম্নবা তরাম্না ওক্লি-তশেং তশেংনা কৌশিঞ্জরি। তৌইগুম্বসুং, মীয়াম্না খন্নবা ‘‘লাইনিংলোন হোংবা’’ হায়বা অসিগুম্বা ৱাহৈশিং অদু মসিগী থৌওং অসিদা চুনদে অমসুং বাহা’ইগী লাইনিংদা মীওই অমবু মহাক্কী লাইনিংবু হোংহন্নবগী কন্না তকশিনবা অদু অয়াবা পীদে।

অসুম্না খল্লবদি, বাহা’ই অমনা মহাক্কী থাজবশিংদু অতোপ্পদা পাওদম্বা মতমদা, থবক অদু মীওইদুবু থাজহন্নবা নত্রগা ৱাখল্লোন অমবু চুম্মী তাক্নবা হায়বা নত্তে। মদুনা হিংনবগী য়ুম্ফম ওইবা হীরমশিংগী মতাংদা ৱাহন্থোক লৈবা ৱারী ৱাতাই শান্নবা অচুম্বা থিদোক্নবা, অমসুং অরানবা ৱাখল্লোনশিংবু কোকহন্নবা হোৎননবগী থম্মোয়শেঙবা পামজবা অমা ফোঙদোকচবনি। ‘‘অতোপ্পশিংনা ফঙজদ্রিবা, অকক্নবা অচুম্বা অমা নহাক্না খঙলবদি,’’ বাহা‘উ’ল্লাহনা হায়বী, ‘‘নত্রগা, সনা লুপা অমা নহাক্না মপু ওইজরবদি, মদুবু মখোয়দা খ্বাইদগী থৌজালহৈনা অমসুং অফবা ৱাখল্লোনগা লোয়ননা লোন্দা অমদা মখোয়দা শরুক তম্মু। মদুবু য়াবীরবা, মদুগী পান্দম অদু মদুনা ফঙজরবদি, নহাক্কী পান্দমসু ফংলবনি।কনাগুম্বা অমনা মদুবু য়াদ্রবা, মহাকপু মথন্তা থম্বীরম্মু, অমসুং মহাকপু লমজিংবীনবা তাইবং মপুদা হায়জৌ।’’

অদুমওইনমক, হেন্না ফবা মালেম অমা শেমগৎপসি থাজবা ফোঙদোকপা খক্তনা মতিকচাদে-মিৎয়েংচংনা হোৎনবা থবকসু দরকার ওই। বাহা‘উ’ল্লাহনা ইবিরম্মী : ‘‘ইরম্লবা অদুবু তশেংবদা অমসুং থবক্তা ওন্থোক্নবা কন্না হোৎনবা হায়বসি নুংহুৎনা উরিবা অমসুং ভাব তারবা মীওই খুদিংমক্কী তৌফদ্রবা মথৌনি’’