বাহা’ই লাইনিং অসি তাইবঙ মপুগী লাইপোক ওইরিবা – বাব অমসুং বাহা‘উ’ল্লাহ – মখোয় অনীদা তাইবঙ মপুনা পীখিবা থৌদাঙ অদুগা লোয়ননা হৌদোকখি। ঙসিদি মখোয়না হৌদোকপীরম্বা লাইনিং অসিনা শেমগৎলক্লিবা অনৌবা মওংগী অপুনবা অসি মহাক্না লৈখিদ্রবা মতুংদসু মখাতান শোইদনা লমজিং লমতাকপীগদবা বাহা‘উ’ল্লাহনা পীবিরম্বা ময়েকশেঙলবা য়াথঙশিংদগী ওইরকপনি। য়ানবা (Covenant) হায়না খঙনরিবা, মহাক্কী মহুৎ শিলহৌগদবা মীওই অদু, বাহা‘উ’ল্লাহগী মচানুপা অব্দুল-বাহানা ওইখি, অমসুং মদুগী মতুংদা অব্দুল-বাহাগী মশুনুপা, শোঘি ইফেন্দীদা ওইখি, অমসুং মমাঙদা বাহা‘উ’ল্লাহনা নোংদমবিরম্লবা তেংপানগী অচুম্বা ৱায়েল লৈঙাকশঙনা ওইরি। বাহা’ই অমনা বাব অমসুং বাহা‘উ’ল্লাহগী তাইবঙ মপুনা পীনবিরবা ওঠোরিটিবু অমসুং মখোয়না হাপ্পীরম্বা মহুৎশিনবশিংদুগী ওঠোরিটি অদু য়াজৈ।

বাব
বাব অসি বাহা’ই লাইনিংগী লময়ানবনি। তরামাপলশুবা চহীচাগী ময়াইচল্লকপা মতম অদুদা, মহাক অসি মীওইবা খুন্নাইগী নুংগী ওইবা পুন্সিবু হোংহন্নবা নোংদমখ্রবা পাওজেল অমা পুরক্লিবা পাওখোল্লোই অমনি হায়না মহাক্না লাওথোকখি। মহাক্কী পান্দমদি, শান্তি অমদি অচুম্বা ৱায়েলগী চাক অমা পুরক্কদৌরিবা, মঙোন্দগী হেন্না মতিক ময়াই লৈবা, তাইবঙ মপুদগী অনীশুবা পাওখোলোই অমা লাক্নবগী লম্বী অদু শেম্বনি।

বাহা‘উ’ল্লাহ
বাব অমসুং হৌখিবা মতমগী তাইবঙ মপুগী লাইপোক পূম্নমক্না লাক্কনি হায়না ৱাশকপীরম্বা অদু ‘‘তাইবঙ মপুগী মশেক মঙাল’’ ওইরিবা-বাহা‘উ’ল্লাহনি। বাহা‘উ’ল্লাহনা তাইবঙ মপুদগী অনৌবা শাফোঙবা অমা মীওইবা জাতীদা পীবিরম্মী। শৈরেং লিশিং লিশিং, চিঠি কয়া অমসুং মশিং য়াম্লবা লাইরিকশিং মহাক্কী খোর্জৈদগী চেন্থখি। মহাক্কী অইবশিংদা, মীওইবগী পুন্সিগী নুংগী অমসুং পোৎচাক্কী ওইবা মায়োল অনীমকসিবু খঙনা শেমগৎহন্নবগী চৎন-কাঙলোন (framework) অমা থাবীরম্মী। মসিগীদমক্তা, কৈশুমশঙদা ফাদোক ওইনা, ওৎনৈবা কয়া অমা অমসুং লোই থাবশিংবু চহী নিফুচুপ্না খাংখি।

অব্দুল - বাহা
মহাক্কী অনিংবদা, বাহা‘উ’ল্লাহনা মহাক্কী মচানুপা অহন, অব্দুল-বাহাবু, মহাক্কী তম্বীরোলশিংগী অমসুং লাইনিং অসিগী লুচিংবা ওইনবা য়াথঙলম্মী। নোংপোক অমসুং নোংচুপ্তা, অব্দুল-বাহা অসি শান্তিগী দুত অমা ওইনা, থোইদোক হেন্দোক্না মতৌ তমজনিংঙাই ওইবা মীওই অমা ওইনা, অমসুং অনৌবা লাইনিং অসিগী শকনাইবা ৱাঙাংলোই অমা ওইনা শকখঙনরকখি।

শোঘি ইফেন্দী
লাইনিং অসিগী ঙাকশেনপুরেল ওইনা অব্দুল-বাহানা খনবীরম্লবা, মহা্ক্কী মশুনুপা অহল, শোঘি ইফেন্দীনা, চহী ৩ ৬ চংনা পরিং পথাপ নাইনা চাওখৎপবু য়োকখৎলম্মী, ভাব তাবদুবু হেন্না মরা তাহল্লম্মী, বাহা’ই খুন্নাইগী অপুনবদু মপাঙ্গল কনখৎহল্লম্মী, লোয়না লোয়ননা বাহা’ই খুন্নাইনা মীওইবা খুন্নাইগী অপুম্বগী মখল মথেল কয়াগী খেন্নবা মওং মতৌদুবু হেন্না হেন্না উত্থোরকলম্মী।

তেংপানগী অচুম্বা ৱায়েল লৈঙাকশঙ
মালেমশিন্থুংবদা লৈরিবা বাহা’ই লাইনিং অসিগী চাওখৎপসি ঙসিদি তেংপানগী অচুম্বা ৱায়েল লৈঙাকশঙনা লমজিং লমতাক্লি। মহাক্কী আইনশিংগী লাইরিক্তা, তেংপানগী অচুম্বা ৱায়েল লৈঙাকশঙনা মীওইবা জাতীগী নুংঙাই য়াইফবদা অফবা ইথিল পীবিনবা, মহৈ মশিং, শান্তি অমসুং তাইবঙপানগী ৱাত্ত-পাদবা অদুবু য়োকখৎনবা, অমসুং মীওইবগী চিংলেম্বা অমসুং লাইনিংলোনগী ফম্বালবু ঙাকশেন্নবা বাহা‘উ’ল্লাহনা য়াথঙ পীবিরম্মী।